გურამიკო ძალიან აქტიური და ცელქია, უყვარს სპორტული თამაშები - სკეიტბორდი, ველოსიპედი, ბურთით და მანქანებით თამაში. საოცრად ბედნიერია, როდესაც გასვლით გაკვეთილზე სპორტდარბაზში მიდის მეგობრებთან ერთად: ყველა ტრენაჟორზე ვარჯიშობს და მაინც არ იღლება! როგორ თითქმის ყველა ბავშვს, გურამსაც უყვარს სასუსნავები და ტკბილეული, განსაკუთრებით შოკოლადი. გურამს შეუძლია დამოუკიდებლად მოძებნოს youtube-ზე თავისი საყვარელი მუსიკალური კლიპები და მოუსმინოს ყურსასმენებით, ეს მისთვის დიდი სიამოვნებაა.

გურამი დაახლოებით 1 წელია, რაც დღის ცენტრში სწავლობს, ამ მცირე დროში „პირველი ნაბიჯი“ მისთვის სასიამოვნო და საყვარელ გარემოდ იქცა, სადაც ჰყავს მეგობრები, ესწრება გაკვეთილებს, აქ მან ბევრი რამ ისწავლა:  პირველ რიგში ალტერნატიული კომუნიკაციის (PECS) პროგრამის 1, 2, და 3 ფაზა, მას უკვე შეუძლია დასურათებული ბარათების მეშვეობით გვესაუბროს და გამოხატოს სურვილები. იმის გამო, რომ ადრე ვერავის აგებინებდა თავის საჭიროებებს, რთული ქცევებიც ხშირი იყო, ეხლა უკვე გაცილებით შემცირდა, რაც დიდი მიღწევაა! PECS პროგრამის ფარგლებში სპეციალისტები გურამს ასწავლიან სიტყვების წარმოთქმასაც, ბიჭუნა აქტიურად იმეორებს მათ, იმდენად ყოჩაღია, რომ ამ მოკლე დროში დაახლოებით 20 სიტყვას გამართულად და მიზანმიმართულად წარმოთქვამს! ეს ჩვენთვის ძალიან მნიშვნელოვანი წინსვლაა! ჩვენ კვლავ ვაგრძელებთ ბიჭუნასთან მუშაობას კომუნიკაციის, თვითმოვლისა და შემეცნებითი უნარების გაუმჯობესების მიზნით და ახალი წარმატებების მოსაპოვებლად.