სიახლეები

სათაური:

ბავშვის უსაფრთხოების დაცვის მინიმალური სტანდარტი

სფერო

წინამდებარე დოკუმენტი წარმოადგენს ბავშვთა უსაფრთხოების დაცვის მინიმალურ სტანდარტს და ეხება:

კოალიციის  ყველა თანამშრომელს,  კოალიციის წევრი ორგანიზაციების  ყველა თანამშრომელს, იმის მიუხედავად, იქნება ეს ადგილობრივი, საერთაშორისო, სრულ და ნახევარ განაკვეთზე მომუშავე პირები, თუ მოკლევადიანი კონტრაქტით დაქირავებული ადამიანები, მაგ. კონსულტანტები, მკვლევრები და ა.შ. მოხალისეებს, ნდობით აღჭურვილ პირებს და საბჭოს წევრებს, ასევე ნებისმიერ პირს, რომელსაც კოალიციასთან ოფიციალური/კონტრაქტით გათვალისწინებული ურთიერთობა გააჩნიათ.

აღნიშნული სტანდარტი ასევე ეხება დონორებს, ჟურნალისტებს, ცნობილ სახეებს, პოლიტიკოსებს და ნებისმიერ მესამე პირს/ებს, რომლებიც ჩაერთვებიან ისეთ ღონისძიებებში ან პროგრამებში სადაც ექნებათ შეხება ბავშვებთან. ისინი წინასწარ გაეცნობიან სტანდარტებს და ვალდებულნი არიან იმოქმედონ შესაბამისად.

ძირითადი მინიმალური სტანდარტები

• კოალიცია და მასში შემავალი ყველა ორგანიზაცია იღებს პასუხისმგებლობას მაქსიმალურად დაიცვას მათ მიერ განხორციელებულ პროგრამებში ბავშვთა უსაფრთხოების დაცვის მინიმალური სტანდარტები
• კოალიციის ყველა წარმომადგენელი და მასში შემავალი ყველა ორგანიზაცია მაღალი ქცევითი სტანდარტების მიხედვით უნდა მოქმედებდეს ბავშვების მიმართ
• ბავშვთა დაცვის მინიმალური სტანდარტი შეიცავს სავალდებულო მოთხოვნებს, რომელიც ეხება, კოალიციას და მასში შემავალ ყველა ორგანიზაციას ნებისმიერ ასპექტში მუშაობისას, იქნება ეს ადვოკატირება თუ კამპანიები, პროგრამების შემუშავება/განხორციელება, ან ჰუმანიტარული საქმიანობა და საგანგებო სიტუაციებზე რეაგირება.

„ბავშვის უსაფრთხოების დაცვის მინიმალური სტანდარტების“ მიდგომები:

ინფორმირებულობა – კოალიციის თითოეული თანამშრომელი და მასში შემავალი ყველა ორგანიზაცია იცნობს და ეთანხმება ბავშვის უსაფრთხოების დაცვის პოლიტიკის დოკუმენტს. თავის მხრივ კოალიცია იღებს პასუხისმგებლობას მისი წევრი ორგანიზაციებისათვის უზრუნველყოს წელიწადში 2 საინფორმაციო შეხვედრა ბავშვთა უსაფრთხოების საკითხებზე;

პრევენცია – კოალიცია და მასში შემავალი ორგანიზაციები თანხმდებიან, რომ ახალი თანამშრომლის აყვანის შემთხვევაში გასაუბრების დროს ხელმძღვანელობენ ბავშვის უსაფრთხოების უზრუნველყოფის ვალდებულებით და იძიებენ შესაბამის ინფორმაციას ყოველ ახალ კანდიდატზე.

ორგანიზაციები მათი სპეციფიკიდან გამომდინარე წინასწარ აფასებენ და საზღვრავენ  მათ მიერ ორგანიზებულ ღონისძიებათა რისკებს. სასურველია ორგანიზაციებს ჰქონდეთ რისკების შეფასების ფორმა.

კოალიცია და მასში შემავალი ორგანიზაციები ბავშვების ფოტოებისა და სხვა პირად ინფორმაციის გავრცელების/გასაჯაროების შემთხვევაში სრულად იცავენ ბავშვის პირადი ცხოვრების დაცვის პრინციპებს.  

შეტყობინება/რეაგირება - ბავშვთა უსაფრთხოების სტანდარტების დარღვევასთან დაკავშირებით არსებული ნებისმიერი ბრალდების, თუნდაც ეჭვის შემთხვევაში აუცილებლად უნდა იქნეს გაკეთებული შეტყობინება ბავშვთა უსაფრთხოების დაცვის მინიმალური სტანდარტების აღსრულებაზე პასუხისმგებელ პირთან, რომელიც თავის მხრივ, ორგანიზაციის შიდა რეგულაციის, 2016 წლის 12 სექტემბრის საქართველოს მთავრობის დადგენილება 437-ის რეფერირების პროცედურებისა და სხვა კანონმდებლობის შესაბამისად, ახდენს რეაგირებას;

„ბავშვის უსაფრთხოების პოლიტიკის“ ფარგლებში მნიშვნელოვანია კოალიციის თანამშრომლებმა და წევრი ორგანიზაციის თანამშრომლებმა გაითვალისწინონ ბავშვის უსაფრთხოების უზრუნველყოფისთვის შემდგომი საკითხები:

1. უნდა უზრუნველყონ ორგანიზაციაში ბავშვთათვის უსაფრთხო ფიზიკური გარემო
2. თანამშრომლების ვერბალური და არავერბალური კომუნკაცია ბავშვის მიმართ არ უნდა იყოს ძალადობრივი, შეურაწმყოფელი, მადისკრიმინირებელი ან/და არ უნდა აყენებდეს ბავშვს ძალადობის რისკის წინაშე
3. თანამშრომლებმა უნდა უზრუნველყონ ბავშვთა მიმართ თანასწორი მოპყრობა
4. დაუშვებელია ყოველგვარი სქესობრივი ურთიერთობა სრულწლოვანის მიერ 18 წლის ასაკს მიუღწეველ პირებთან, მათ შორის სექსუალურად მაპროვოცირებელი ქცევა არასრულწლოვანის მიმართ და სექსუალური ექსპლუატაცია

შენიშვნა: ეს ჩამონათვალი არც ამომწურავია და არც ექსკლუზიური. თანამშრომლებმა, პარტნიორებმა და სხვა წარმომადგენლებმა ყოველთვის უნდა იმოქმედონ ბავშვის საუკეთესო ინტერესებიდან გამომდინარე და თავი უნდა აარიდონ ისეთ ქმედებას ან ქცევას, რის გამოც შეიძლება საქციელი არასწორად იქნას ინტერპრეტირებული, ან წარმოშვას არასწორი პრაქტიკა თუ პოტენციურად შეურაცხმყოფელი ქცევა.

გამონაკლის დაუშვებლობა

ბავშვის უსაფრთხოების დაცვის მინიმალური სტანდარტების დაცვა ევალება წინამდებარე დოკუმენტში აღნიშნულ ყველა პირსა და ორგანიზაციას გამონაკლისი გარეშე.

განმარტებები

ბავშვი - 18 წლამდე ასაკის პირი (არასრულწლოვანი)

ძალადობა - პირის მიერ ბავშვის კონსტიტუციური უფლებებისა და თავისუფლებების დარღვევა უგულებელყოფით ან/და ფიზიკური, ფსიქოლოგიური, ეკონომიკური, სექსუალური ძალადობით ან იძულებით, მიუხედავად იმისა, ეს ქმედება განხორციელდა/ხორციელდება განზრახვით ან/და განზრახვის გარეშე.

სექსუალური ექსპლუატაცია - პირის ჩაბმა პროსტიტუციაში, სხვა სახის სქესობრივ მომსახურებაში ან პორნოგრაფიული მასალის წარმოებაში მის მიმართ მუქარის, ძალადობის, იძულების, შანტაჟის ან მისი უმწეო მდგომარეობის გამოყენებით, სამსახურებრივი მდგომარეობის გამოყენებით ან სამუშაოს ხასიათისა და პირობების შესახებ ყალბი ინფორმაციის მიწოდებით

ბავშვის საუკეთესო ინტერესები – პრინციპი , რომელიც აღიარებს ბავშვის ინტერესების უპირატესობას ყველა სხვასუბიექტის ინტერესებზე და მოიცავს ბავშვის უსაფრთხოების, კეთილდღეობის, ჯანმრთელობის დაცვის, განათლებისა დაგანვითარების შესაძლებლობებს, რომლებიც მისი ინდივიდუალური მახასიათებლებისა და საერთაშორისო სტანდარტების შესაბამისად განისაზღვრება.

ბავშვთა უსაფრთხოების დაცვის მინიმალური სტანდარტების აღსრულებაზე პასუხისმგებელ პირი - არის ორგანიზაციის მიერ გამოყოფილი პირი, რომელიც ორგანიზაციის შიდა რეგულაციისა და საქართველოს კანონმდებლობის შესაბამისად რეაგირებს ბავშვთა უსაფრთხოების სტანდარტების დარღვევასთან დაკავშირებით არსებული ნებისმიერი ბრალდებაზე, თუნდაც ეჭვზე. 

სავალდებულო პროცედურები კოალიციისა და მასში შემავალი ორგანიზაციებისთვის

• კოალიციის ყველა თანამშრომელი და მასში შემავალი ორგანიზაციები იცნობენ ბავშვზე ძალადობის და სექსუალური ექსპლუატაციის პრობლემას და ბავშვების მიმართ არსებულ რისკებს.
• კოალიციის ყველა თანამშრომელი და მასში შემავალი ორგანიზაციები იღებენ ვალდებულებას, რომ მიიღონ ყველა შესაძლო ზომა რათა წინამდებარე დოკუმენტებში ასახული რისკები მინიმუმამდე დაიყვანონ და ბავშვები აარიდონ ნებისმიერ ზიანს. იღებენ პასუხისმგებლობას შექმნან ისეთი გარემო, სადაც ბავშვების უფლებები დაცულია, ხოლო ბავშვზე ძალადობა და სექსუალური ექსპლუატაცია თავიდან არის აცილებული.
• კოალიციის ყველა თანამშრომელმა და მასში შემავალმა ორგანიზაციებმა ნათლად უნდა იცოდნენ, თუ როდის უნდა მოახდინონ შეტყობინება საფუძვლიანი ეჭვების შესახებ და რა ნაბიჯები გადადგან ბავშვებზე ძალადობის, ან მათი ექსპლუატაციის მიმართ ეჭვების წარმოშობის შემთხვევაში.
• თითოეული ორგანიზაციის პასუხისმგებელი პირი უზრუნველყოფს, წინამდებარე სტანდარტების დაკმაყოფილებას, ან მოქმედებას მათ ორგანიზაციაში არსებული მსგავსი სტანდარტის მიხედვით, ასევე ქმნის შემთხვევის შეტყობინების შიდა ორგანიზაციულ სქემას და შეარჩევს პასუხისმგებელ პირს, რათა საფუძვლიანად დანერგოს ბავშვთა უსაფრთხოების დაცვის პროტოკოლი.

კოალიცია და მასში შემავალი თითოეული ორგანიზაცია ვალდებულია:

• გამოყოს ბავშვთა უსაფრთხოების დაცვის პოლიტიკაზე პასუხისმგებელი პირი; ეს შეიძლება იყოს ნებისმიერი ადამიანი, შესაბამისი კადრის არ არსებობის შემთხვევაში თავად ორგანიზაციის დირექტორი;
• ბავშვთა უსაფრთხოების სტანდარტების დარღვევასთან დაკავშირებით არსებული ნებისმიერი ბრალდების, თუნდაც ეჭვის შემთხვევაში აუცილებლად გააკეთოს შეტყობინება ბავშვთა უსაფრთხოების დაცვის პოლიტიკაზე პასუხისმგებელ პირთან;
• შეტყობინების მიმღებმა პირმა ყოველგვარი გამოძიების გარეშე პირდაპირ უნდა დაიწყოს კანონმდებლობით გათვალისწინებული შესაბამისი მოქმედება;

წინამდებარე პოლიტიკის ნებისმიერი დარღვევა გამოძიებული იქნება „ადგილობრივი პროცედურების“ და წინამდებარე „ბავშვის უსაფრთხოების მინიმალური სტანდარტების“  შესაბამისად. აღნიშნული დარღვევა დისციპლინურ  დარღვევად უნდა განიხილებოდეს ორგანიზაციების მარეგულირებელი დოკუმენტების შესაბამისად და იწვევდეს ამავე რეგულაციებით გათვალიწინებულ შედეგებს, მათ შორის სამსახურიდან დათხოვნას.

დამატებითი მითითება

კოალიცია იღებს ბავშვთა უსაფრთხოების უზრუნველყოფის სრულ ვალდებულებას.

კოალიციის წევრი ყველა ორგანიზაციის ხელმძღვანელს ევალება:

• ხელი შეუწყოს ბავშვის უსაფრთხოების კულტურის დანერგვას საკუთარ ორგანიზაციაში, რათა ნებისმიერი სახის პრობლემური საკითხი შეიძლება წამოიჭრას დაუბრკოლებლად და განხილულ იქნას ღიაობის პრინციპით;
• უზრუნველყოს თანამშრომლებს შორის ანგარიშვალდებულების გაღვივებას ისე, რომ არასათანადო პრაქტიკის ან პოტენციურად ძალადობრივი ქცევის მიმართ რეაგირება მოხდეს დაყოვნების გარეშე;
• უზრუნველყოს ორგანიზაციის პროგრამებში თუ მომსახურებებში ჩართული ბავშვების ასაკის შესაბამისად ინფორმირებულობა და შეტყობინების მექანიზმის შექმნა;
• გააძლიერონ ბენეფიციარი ბავშვები და გააცნონ მათ თავიანთი უფლებები, იმის შესახებ თუ რა არის მისაღები და მიუღებელი ქცევა და რისი გაკეთება შეუძლიათ მათ პრობლემის წარმოშობის შემთხვევაში.

ანგარიშვალდებულება

თუ  კოალიციის თანამშრომელი, მისი წევრი ორგანიზაცია ან ამ ორგანიზაციის რომელიმე თანამშრომელი არღვევს არსებულ სტანდარტებს და  თავად ორგანიზაცია არ რეაგირებს არსებულ დარღვევაზე კანონის შესაბამისად და  ამის შესახებ  ცნობილია კოალიციის სხვა წევრი ორგანიზაციისათვის,  მათ აქვთ ვალდებულება ეს საკითხი წარადგინონ კოალიციის  საბჭოს კრებაზე.  კოალიციის საბჭო იმსჯელებს არსებულ საკითხზე და შეადგენს მოქმედების გეგმას, ასევე განიხილავს საკითხს კოალიციის წევრობიდან გარიცხვის თაობაზე.

ცენტრალური პროცედურები

• კოალიციისთვის გაწერილი ყველა პროცედურა ეხება მასში შემავალ თითოეულ ორგანიზაციას შესაბამისი ცვლილებების გათვალისწინებით.
• კოალიციას ეკისრება ზოგადი ვალდებულება “ბავშვის უსაფრთხოების მინიმალური სტანდარტების” განხორციელების მიმართ.

კოალიციამ უნდა უზრუნველყოს, რომ თითოეული ორგანიზაციის ხელმძღვანელ პირებს გააცნოს წინამდებარე დოკუმენტი, რაც დასტურდება ხელმოწერით. ორგანიზაციის ხელმძღვანელი თავის მხრივ უზრუნველყოფს აღნიშნული დოკუმენტის გაცნობას თანამშრომლებისთვის. 

კოალიცია ვალდებულია ჩამოაყალიბოს  ცენტრალიზებული შეტყობინების სისტემა, ზემოაღნიშნული სტანდარტების დარღვევის შესახებ მომართვებზე რეაგირების და ზედამხედველობის მიზნით.

კოალიციის წევრი ორგანიზაციები

1. საქართველოს ბავშვები
2. საქართველოს სოციალურ მუშაკთა ასოციაცია
3. საქართველოს SOS ბავშვთა სოფელი
4. გადავარჩინოთ ბავშვები საქართველოს ოფისი
5. პარტნიორობა ადამიანის უფლებებისთვის
6. World Vision საქართველო
7. პარტნიორობა ბავშვებისათვის
8. პირველი ნაბიჯი საქართველო
9. საზოგადოებრივი ჯანდაცვის ფონდი
10. ანიკა
11. გლობალური ინიციატივა ფსიქიატრიაში
12. თანადგომა
13. საერთაშორისო ასოციაცია "კივიტას გეორგიკა"
14. ლეიკოზიით დაავადებულ ბავშვთა დახმარების საერთაშორისო ასოციაცია
15. მაკლეინის ასოციაცია ბავშვებისათვის
16. საქართველოს კარიტასი
17. სტუდია ეიდისი
18. ასოციაცია უფლება ჯანმრთელობაზე
19. ქალთა საინფორმაციო ცენტრი
20. ძალადობისაგან დაცვის ეროვნული ქსელი
21. მცირე საოჯახო სახლების ასოციაცია
22. ჩვენი სახლი საქართველო
23. წამების მსხვერპლთა ფსიქოსოციალური და სამედიცინო რეაბილიტაციის ცენტრი
24. ინიციატივა მოწყვლადი ჯგუფების რეაბილიტაციისათვის
25. საზოგადოება ბილიკი
26. არაძალადობრივი კომუნიკაციის ინსტიტუტი
27. კავშირი “იმედიპლიუსი“
28. ასოციაცია ბავშვი და ოჯახი
29. სმენისა და   მტყველების დარღვევის    მქონე     ბავშვთა     დახმარების    ასოციაცია (მშობელთა კავშირი)
30. კეთილდღეობისა და განვითარების ცენტრი
31. კავშირი "ორიონი"
32. ინიციატივა სოციალური ცვლილებებისათვის
33. რუსთავის საერთაშორისო სკაუტური ცენტრი
34. ახალგაზრდა პედაგოგთა კავშირი
35. დივაინ ჩაილდ ფაუნდეიშენ ოფ ჯორჯია
36. პარტნიორობა სოციალური კეთილდღეობისათვის-პსკ
37. “ბავშვთა კეთილდღეობის ლიგა”
38. ბავშვი, ოჯახი, საზოგადოება
39. ლეიკოზით დაავადებულ ბავშვთა დახმარების საერთაშორისო საქველმოქმედო ფონდი
40. ძალადობისაგან დაცვის ეროვნული ქსელის მცხეთა-მთიანეთის კომიტეტი
41. თანაბარი შესაძლებლობების პოლიტიკის და ადვოკატირების ინსტიტუტი
42. ახალგაზრდული აზროვნება
43. ბავშვი და გარემო
44. ბავშვთა ასაკის შეზღუდულ შესაძლებლობათა საქართველოს აკადემია
45. მშობელთა საინფორმაციო ცენტრი
46. მშობლების თანადგომა
47. სამოქალაქო საზოგადოების განვითარების ცენტრი (CSDC)
48. საფარი